Առավոտը՝ նրա կողքին

Դու ցանկանում ես, որ արթնանալուն պես նա իր կողքին կատարյալ մի կերպար տեսնի, բայց քո տրամադրության տակ ընդամենը հաշված րոպեներ են և մինիմալ քանակության միջոցներ: Էլ չասած, որ այդ հաշված րոպեների ընթացքում թեժ գիշերվանից հետո կատարյալ բայց և միաժամանակ բնական կերպարի ստացման ընթացքը պետք է լինի շատ աննկատ և անաղմուկ: Ուրեմն` արթնանում ենք նրանցից շուտ, վազքով լոգարանում մեզ կարգի բերում, ապա նորից վազում անկողին ու նրա գրկում քուն մտնում:

Ըստ Մարգարիտա Եսոյանի

Առավոտն ինքնըստինքյան թարմության ու մաքրության պատկերացումներ է առաջացնում, հետևաբար կատարյալ աղջկա կերպարը, որին սիրելիդ պետք է տեսնի իր կողքին առավոտյան աչքերը բացելուն պես, ստանալը պարզապես մի քանի հեշտ քայլերի դիմելու միջոցով:

Ընդհանուր հիգիենա: Ա՛յ, եթե դու այդ պահին գտնվեիր քո տան լոգասենյակում, բարի փերու կախարդական փայտիկի մի շարժումով միանշանակ ամեն ինչ իր տեղը կընկներ: Բայց հոգ չէ: Ատամներդ կարող ես լվանալ նաև առանց խոզանակի: Վերցրու ատամների լվանալու մածուկը և մաքուր մատերիդ միջոցով տարածիր այն ատամներիդ ու լեզվիդ վրա: Այնուհետև ողողիր ջրով: Եթե լոգանք ընդունելու ժամանակ չկա, ապա կարող ես դիմել հետևալ հնարքի: Օճառի շատ քիչ քանակություն քսիր թևատակերիդ և լվա սառը ջրով: Թարմության զգացողությունն ապահովված է:

Մազեր: Բուռն գիշերը միանշանակ իր հետքերը թողած կլինի քո վարսահարդարման վրա: Քանի որ դու պետք է ամենը շատ աննկատ և անձայն անես, ապա սիրելիիդ վարսահարդարիչով մազերդ հարդարելու տարբերակը չի կարող գործել: Եթե պայուսակիդ մեջ մազակալ լինի, ապա թացացրու ձեռքերդ և, մատներով հարդարելով, անփույթ կապված ձիու պոչիկ ստացիր կամ թեթև հյուսք արա: Իսկ եթե վարսերդ կարճ են, ապա մատների միջոցով խոնավացրու մազերդ` վերջիններիս տալով ցանկալի ձև:

Դիմահարդարում: Եթե պատրաստվում ես ձեռքդ տանել դեպի դիմահարդարման պարագաների պայուսակդ ու վերականգնել նախորդ գիշեր ունեցած վառ դիմահարդարումը, ապա կշտապեմ կանգնեցնել քեզ: Սիրելիիդ լոգասենյակում միանշանակ կլինեն ականջների մաքրման ձողիկներ: Վերջիներիս օգնությամբ հեշտությամբ կմաքրես աչքերիդ լղոզված սևաներկը, ստվերաներկն ու մատիտը: Դեմքին թարմություն հաղորդելու համար սառը ջրի կաթիլներ ցանի դեմքիդ, բայց ոչ մի դեպքում մի չորացրու սրբիչով: Իսկ եթե քեզ բախտ վիճակվի նրա մոտ վազելին գտնել, ապա հյութեղ բայց բնական շուրթեր ունենալը ապահովված է:

Եվ որպես հավելում խորհուրդ կտամ, եթե դու քիչ թե շատ կասկածում ես, որ երեկոն կարող է հետաքրքիր ընթացք ունենալ, ապա ավելի լավ կլինի, որ պայուսակիդ մեջ ունենաս խոնավ անձեռոցիկներ, կարմրությունները ծածկող քսուք և սանր:

Հարցեր, պատասխաններ, մեկնաբանություններ